Tema: Teenoorgesteldes
Bybelstorie: Dawid en Goliat
Waarde: Vertrou op God se beskerming
Dawid en Goliat
In die Bybel leer ons van ’n jong seun met die naam Dawid. Dawid het vir skape gesorg en God met sy hele hart liefgehad.
Eendag het die Filistyne teen God se volk, die Israeliete, geveg. Een van hulle was ’n reus genaamd Goliat. Hy was groot en sterk en het slegte dinge oor God gesê. Niemand was dapper genoeg om teen hom te veg nie.
Maar Dawid was nie bang nie. Hy het geweet God sou hom beskerm. “Ek sal teen Goliat veg!” het Dawid gesê. Die koning was verbaas, maar het hom laat gaan. Dawid het nie swaar wapenrusting gedra of ’n swaard gebruik nie. Hy het vyf gladde klippies opgetel en sy slinger gedra.
Goliat het gelag toe hy vir klein Dawid sien. “Jy kan nie teen my veg nie!” het die reus gesê. Maar Dawid het God vertrou. Hy het ’n klip in sy slinger gesit, dit omgeswaai en laat vlieg. Die klip het Goliat reg op sy voorkop getref, en die reus het op die grond geval!
Almal het gejuig, en Dawid was die held. Dawid het vir almal gewys dat God se beskerming sterker is as enige reus. God het Dawid gehelp om te wen omdat Dawid op Hom vertrou het.
(1 Samuel 17)
- Opening
Kan jy vir my wys hoe lank ‘n reus is?
(Wys dat ‘n reus langer as die deur is)
Sjoe, dis baie lank! Baie langer as ek en jy.
Vandag gaan ons leer oor ‘n klein seuntjie en ‘n groot reus. Kom ons lees die Bybelverhaal.
- Ontdek
Kan jy die storie onthou wat ons gister gelees het?
Ja, ons het gesels oor klein Dawid en groot Goliat. Kom ons lees weer die Bybelverhaal.
Wat is jou gunsteling deel van die storie?
Kan jy vir my wys watter een op die prentjie is klein Dawid?
En watter een is groot Goliat?
- Vertel weer die storie
Kan jy vir my vertel wat gister in ons storie gebeur het? (Vra vrae en lei die kind deur die prent en storie te gebruik.)
Hoe het al die soldate gevoel toe hulle Goliat sien?
Wanneer voel jy bang?
- Waarde
Hierdie week het ons gesels oor hoe klein Dawid vir groot Goliat gewen het.
Hoe het Dawid gevoel toe hy Goliat gesien het?
Hoekom was hy nie bang nie?
Kan jy dink aan ‘n tyd toe jy dapper was? (Vra vir voorbeelde)
Dawid was baie dapper toe hy teen Goliat geveg het. Hy het vertrou dat God hom sou help. Jy kan ook dapper wees soos Dawid! As jy bang of hartseer voel, kan jy vir God vra om jou te help, en Hy sal!
Hoe kan God jou help om vandag dapper te wees?
- Aktiwiteit
In ons storie hierdie week het ons geleer dat ons dapper kan wees net soos Dawid toe hy teenoor Goliat opgestaan het. As jy op God vertrou kan jy ook groot dinge doen, al is jy klein.
Vandag gaan ons ‘n paar klippies verf, net soos die een wat Dawid gebruik het om Goliat te wen.
(Gee vir elke kind ‘n klip en verf om dit te versier. Terwyl hulle verf, praat oor hoe dapper Dawid was toe hy op God vertrou het.)